Иван Лотески е среќниот фаќач на Чесниот Крст во Охридското езеро. Во присуство на десетина илјади верници, денеска, на градското пристаниште , беа осветени водите на Охридското Езеро, црковно- народна манифестација која се одржува по повод чествувањето на големиот православен празник Богојавление – Водици.

Во изјава за медиумите, вршителот на должност градоначалник, Константин Георгиески на сите охриѓани им посака да бидат вечно здрави и толерантни еден спрема друг, и додаде  „како локална самоуправа направивме се што е во наш домен манифестацијата да биде организирана на едно високо ниво. Мислам дека таа традиција и во иднина ќе се задржи“.

Среќниот фаќач на крстот од страна на Дебарско-кичевската епархија доби на подарок ланче со златен крст, а синот  на покојниот градоначалник, Јован Стојаноски, Димитар Стојаноски, во името на локалната самоуправа му врачи рачно изработена икона.

Празнувањата за „Водици“ продолжуваат во 12 часот на Сараиште со групно крштевање и утре, со манифестацијата „Денот на Рибарите“ што ќе се одржи на малиот плоштад кај хотел „Александрија“, каде традиционално ќе биде поделена рибна чорба, греана ракија, пача и вино, а за забавата ќе се погрижи ансамбл ,,Билјана јуниор“.