Со „Игрите без граници“ кои со најмладите охриѓанчиња, вчера и денес се одржаа во специјално подготвената куќичка на Градскиот плоштад во Охрид започнаа активностите од проектот „Од 20-ти до 20-ти - СИТЕ ВО ОХРИД“.

Водител беше познатиот Радио и Тв водител Жанко ЗШ Голабоски, а најмладите се забавуваа и со Дедо Мраз и со музиката на Дџ.

Новата локална самоуправа на гостите оваа година им нуди нов концепт за прославување на празниците и можност да го поминат најатрактивниот период во годината во прекрасниот Охрид со посебна програма од 20-ти декември до 20-ти јануари.

- Ќе има 30 дена забава, на пет сцени. Ќе уживаме во „Чоколадниот новогодишен свет“. „Игрите без граници“, театарски претстави и изложби на отворено, трки на Дедо мразовци и келнери, ден на виното, најдобрите графити и многу други настани, информираат организаторите.

Програмата за викендов предвидува старт на сегментот „Од СРЦЕ за Охрид“, кој ќе се одвива во посебно направената куќичка на самиот плоштад.

- Гостин во сабота и недела ќе ни биде Дедо мраз, а ќе настапат децата од детските фестивали. Нашиот Дџ ќе ни пушта одбрана музика, а ќе имаме и подароци за дечињата. Водител ќе биде Александра од Супер радио, а ќе имаме и многу изненадувања за најмладите, порачуваат организаторите.

Во рамките на проектот „Од 20-ти до 20-ти - СИТЕ ВО ОХРИД“ во сабота, 23-ти декември, во Центарот за култура „Григор Прличев“ во Охрид ќе се одржи Културно забавната манифестација „Зимска бајка 2017“, а во недела Дедо Мраз ќе пристигне во Охрид со авион. Општина Охрид во соработка со ТАВ Македонија, за децата од предшколска возраст од детската градинка „Јасна Ристеска“, ќе организира групен пречек на Дедо мраз на охридскиот аеродром. По неговото пристигнување, на децата ќе им бидат поделени новогодишни пакетчиња.