Градоначалникот Никола Бакрачески денес  прими претставници од Факултетот за физичка култура при Универзитетот “Св. Кирил и Методиј“ од Скопје“, предводени од  деканот Вујица Живковиќ.
На работната  средба се разговараше за идеалните услови кои ги нуди Охрид  за развој на спортски и здравствен туризам. Во развојот на овој вид туризам, заеднички со стручна помош и обука на кадри би се вклучиле  медицинскиот и факултетите за  туризам и физичка култура.

Беше заклучено дека  битен предуслов за развој на спортскиот туризам во Охрид   е изградба на Спортско рекреативниот  центар “Билјанини извори“ во кој се предвидени:  главно фудбалско игралиште,   две помошни игралишта  со природна и  едно  игралиште со  вештачка трева. Со тоа Охрид ќе биде втор град во државава со четири фудбалски игралишта.  Центарот ќе  располага  и со отворен и затворен базен, две спортски сали- голема и фитнес сала  , шест игралишта за кошарка и осум за тенис.  Во план е изградба на игралиште за хокеј на трева а се размислув а и за  покриена  атлетска патека со должина од 120 метри,  која ќе се наоѓа помеѓу спорската сала и игралиштето.
Градоначалникот Бакрачески побара од Факултетот за туризам заедно со Пливачката федерација на Македонија да се вклучат во организацијата на Меѓународниот пливачки маратон , со цел  истиот да го врати дамнешниот  сјај  како врвен спортски и туристичко препознатлив бренд на Охрид.

Гостите, го поздравија спектакуларното отворање и организацијата на  спортскиот настан “Гимназијада“, што  се одржа во Охрид како и ангажирањето на професорите по физичка  култура во охридските основни училишта.
Инаку,охридската локална власт ќе даде логистичка поддршка за првата Меѓународна научна конференција по физичко образование , спорт и здравје што на крајов од овој месец ќе се одржи во Охрид. 

Извор: www.ohrid.gov.mk