|
Градоначалникот на Охрид Никола Бакрачески во присуство на мештаните од
село Велестово и бројни охриѓани, денеска свечено го стави во употреба патот
Охрид – Велестово којшто е реконструиран по целата должина од 4 087
метри.
Според градоначалникот Бакрачески денешниот настан е потврда
на стратегијата на локалната власт за подеднаков и рамномерен развој на сите
делови од Охрид.
-Импактот од реконструкцијата на овој патен правец сметаме дека ќе
биде повеќекратен пред се за жителите на ова охридско село кои од
70-те години на минатиот век до сега одеа по видно оштетен пат затоа што ова
е негова прва посериозна реконструкција од тогаш. Корист ќе имаат и
туристите и гостите коишто доаѓаат во Охрид и кои ги користат
благодетите на руралниот туризам како и рекреативците кои патеката ја
користат за таа намена, рече градоначалникот Бакрачески
осврнувајќи се на параметрите од овој патен правец.
- Асфалтирана е вкупна површина од 17 400 м2 во должина
од 4 087 м. Проектот го започнавме минатата година кога во прва
фаза на асфалтирање беа опфатени околу 900 метри
односно две делници и тоа: делницата на влезот во селото Велестово и
делницата што е на почетокот на патот од бензинската пумпа на
Националниот Парк „Галичица“. Годинава се реализира
втората фаза во која беа асфалтирани дополнителни 3.217 м. Патот
којшто е широк 3,5 метри е проширен за повеќе од 50
сантиметри и се поставени банкини по целата должина со широчина од 0,5
метри. Поставен е висококвалитетен асфалт. Во првата фаза вредноста на
реконструкцијата беше 6.556.611 денари, пари обезбедени од
Агенцијата за патишта на Р. Македонија а во втората фаза
вредноста е 14.539 474 денари, средства обезбедени од Агенцијата за поддршка
на руралниот развој при Владата на РМ.Вкупната вредност на проектот е
21.096.085 денари, додаде Бакрачески
-Му благодарам на градоначалникот Бакрачески за прекрасно
изградениот пат. Пат кој што одамна требаше да биде направен , пат кој беше
многупати ветуван од други власти ноникогаш изграден. Уште еднаш ви
благодариме , бидејќи вие собравте сили, покажавте доблест и се направи овој
пат. Овој пат ќе го отвори развојот на Велестово, една прекрасна дестинација
како за развој на руралниот , така и на селскиот, планински туризам , а пред
се ќе го подобри животот, на оние малку семејства кои живеат во село
Велестово, истакна Стојан Митрески од МЗ Велестово.
Општина Охрид во изминатиов период ги реконструира патиштата и кон
останатите охридски села, Елешец- Елшани; Вапила – Сирула;Патот што ги
поврзува Горно и Долно Лакочереј; неодамна заврши реконструкцијата на патот
Вапила Ливоишта, започнати се подготвителни активности за асфалтирање
на патот Рача – Кромидиште по што наредниов период ќе започне
реконструкцијата на патот Косел -Ливоишта.
Патишта имаме изградено во Косел, Коњско, Лескоец, Велгошти и во други
охридски села.
Извор: www.ohrid.gov.mk |
