На пригоден начин    со полагање свежо цвеќе  и со културно уметничка програма општина Охрид  достојно ја одбележа   70 годишнината од ослободувањето на градов.

Пред спомен  обележјата на борците во Градскиот парк, пред Основниот суд и во дворот на СОСУ  “Св. Кирил и Методиј“ како и пред  споменикот  на Јасна Ристеска и кај Спомен паркот на револуцијата    се поклонија  делегации од општина Охрид , од политичките партии и од  Сојузот на борци.

Одбележувањето на празникот продолжи со пригодна свеченост во зградата на општина Охрид  . Пред присутните се обрати претседателката на охридскиот совет, Гордана Коњановска/

-Низ историјата Охрид и охриѓани секогаш знаеле да ги препознаат вистинските вредности и да застанат на страната на човекољубието, правдата и слободата. Илинденската епопеја, Балканските војни и Првата Светска Војна се трагични епизоди, но и скалило повеќе кон целосното ожитворување на идеалот за слобода, еднаквост и човечките правдини, кој се реализира со застанувањето на македонскиот народ на страната на антифашистичката коалиција во Втората светска војна во која беа положени илјадници животи, за конечна победа и слобода на Македонија.
Денес 70 години потоа, жртвата на нашите херои не обврзува, да ја сочуваме и збогатуваме слободата со нови содржини кои ги наметнува современието. Ако идеалот на нашите илинденци и партизани беше национална слобода, денес слободата во Македонија треба да се освојува во секој сегмент од живеењето и работењето за секој граѓанин. Верувам дека ние како генерација успешно се справуваме со овој предизвик, а со тоа се ставаме на страната на демократските и просперитетни државни заедници. Исто така, уверена сум дека како локална власт ги правиме најдобрите чекори за развој на Охрид и негово уште поцврсто етаблирање на мапата на најпрепознатливи светски дестинации.
Дозволете ми моето обраќање да го завршам со парафразирање на големиот Јане Сандански: Ако животот е борба во која нашите татковци се избориле за слобода, нашата генерација треба да се бори за совршенство и така најдобро ќе го исполниме аманетот на нашите предци за слободна, просперитетна и вековита Македонија, во која Охрид ќе биде нејзиниот најсјаен бисер, рече Коњановска, по чие  обраќање присутните ја проследија културно- уметничката програма на која учествуваа хорот и рецитаторската секција при ОУ “Христо Узунов“, хорот  при  Здружението на пензионери , учениците од ОМУ “Методи Патче“ и соло настапот на две ученички од ОУ “Григор Прличев“.
  Веднаш потоа  присутните ја  разгледаа и изложбата  во холот  на општина Охрид со слики  од учениците од охридските основни училишта.

Чествувањата  по повод “7-ми Ноември“ кој е и патрон  празник на ЈП “Охридски комуналец“ и  на ЈОУГД  “Јасна Ристеска”  ќе биде заокружен попладнево  со хепенинг во СРЦ “Билјанини   Извори”, каде празникот ќе го одбележат најмладите охриѓанчиња.

Извор: www.ohrid.gov.mk