![](http://ohrid.gov.mk/pictures/Raboten_sostanok_hotelieri_4853.jpg)
По неколкуте откажани туристички аранжмани, состојбата се стабилизира и нема нови откажувања, туку се потпишуваат и договори за наредната туристичка сезона. Ова беше потенцирано на денешниот работен појадок во хотелот „ Гранит“ , кој го организира Секторот за туризам и локален економски развој, а присуствуваа градоначалникот Никола Бакрачески и претставници на туристичкиот бизнис сектор.
-По најавите за откажување на неколку туристички аранжмани, на иницијатива на локалната самоуправа , пред три недели одржавме работен состанок со туристичките работници и се договоривме како брзо да реагираме. Со помош на министерствата за надворешни и внатрешни работи, како и министерството за економија, странските и нашите амбасади во земјите од каде доаѓаат странски туристи, успеавме да ја презентираме реалната состојба, потенцирајќи дека безбедноста е на високо ниво и дека нема причини да се откажуваат аранжманите. Паралелно преку нашиот Сектор за туризам и локален економски развој ја зајакнавме презентацијата на туристичката понуда на Охрид и успеавме нашиот град да биде се поприсутен во странските медиуми и специјализираните списанија.Таквиот пристап беше одлучувачки за подобрувањето на вкупниот имиџ на Република Македонија и Охрид, со што се приддонесе да нема откажувања на туристичките аранжмани-рече градоначалникот Никола Бакрачески.
Туристичките работници констатираа дека резултатите од тие активности се видливи и дека не само што не се откажуваат аранжмани, туку се потпишуваат нови договори за следните години. Од „ Фибула- травел“ соопштија дека нивниот партнер „ Корендон“ од Холандија вчера ги информирал дека со десетина хотели од охридско- струшкиот регион ќе бидат потпишани нови договори за следните три години, за носење туристи од земјите на Бенелукс.
![](http://ohrid.gov.mk/pictures/Raboten_sostanok_hotelieri_4852.jpg)
На крајот на работниот појадок со туристичките работници беа усвоени заклучоци во кои се потенцира дека откажувањето на туристичките аранжмани за кус период е сведено на минимум, дека ќе продолжи склучувањето на договори за следните години, Република Македонија и Охрид се потврдуваат како атрактивна туристичка дестинација и дека ќе се интензивираат ваквите средби и во поширок состав со присуство на претставници на државни органи кои се поврзани со развојот на туризмот.
![](http://ohrid.gov.mk/pictures/Raboten_sostanok_hotelieri_4854.jpg)
Извор: www.ohrid.gov.mk |