Градоначалникот, Никола Бакрачески денеска во Охрид, оствари средба со Амбасадорката на Австралија зa Република Македонија Јулија Фени, чие претставништво се наоѓа во Белград- Република Србија, и со почесниот конзул од Република Македонија во Австралија, Зоран Костовски.

Во опуштена  атмосфера со кафе муабет, градоначалникот Бакрачески ги запозна своите гости со културно –историските обележја и убавини на Охрид кој поради своите специфичности долги години е под заштита  на УНЕСКО. Се разгледуваа можностите за соработка  меѓу охридскиот  и универзитетот кој функционира во збратимениот град со Охрид, Волонгонг каде живеат и работат голем  број Македонци при што беше потенцирано дека токму универзитетот  во овој австралиски град стипендира голем број странски студенти и дека таа можност е добро да ја искористат и охридските студенти.
На средбата беа разменети мислења за јакнење на економската соработка, размена на искуства од областа на туризмот,  привлекувањето на австралиски инвестиции, како и користење на финансиски средства од невладини организации. Се разговараше и за можностите што ги нуди Охрид за влез на хотели од висока категорија на крајбрежјето, како и за можностите за развој на здравствен туризам.

Градоначалникот Бакрачески истакна дека Општина Охрид ги прави сите напори и дека во тек е подготовката на планската документација за отворање на првата индустриска развојна зона во градов, со што ќе се зголеми заинтересираноста на странски инвеститори да инвестираат во охридскиот регион, а воедно со тоа  ќе се  створат услови  за отворање голем број работни места, што е приоритетен ангажман на локалната власт во овој момент.
Во рамки на економското заживување наОхрид,  градоначалникот Бакрачески, рече дека во градов се создадени сите предуслови за развој и инвестирање во многу области како земјоделството, производството на здрава храна, автомобилска индустрија и ИТ технологијата.

Во насока на културната соработка меѓу Македонија и Австралија , амбасадорката Фени покажа интерес во иднина ликовни изложби од австралиски уметници да се организираат и  излагаат во убавиот Охрид, а пројави желба оваа година да присуствува и на отворањето на најпрестижната музичко - сценска манифестација во земјава фестивалот “ОхридскоЛето“.    

На крајот од средбата двете страни најавија зацврстување на меѓусебните контакти кои ќе вродат подобра соработка меѓудвете земји во туристичката,образовната, културната и економската сфера.

Извор: www.ohrid.gov.mk