Во пресрет на првите 100 дена од отпочнувањето на 4 годишниот мандат – градоначалник на општина Охрид, денеска градоначалникот Бакрачески во своето експозе даде отчет за сработеното и повторно ја истакна цврстата заложба за поставувањето принципи на современо управување и донесување одлуки, како единствена цел – да одговори на модерните форми на менаџирање со општината и да овозможи подигнување на квалитетот на живот на граѓаните на општина Охрид.

Обраќањето на Градоначалникот Ви го претставуваме во целост.

Почитувани граѓани на Охрид, почитувани претставници на медиумите,
Изминуваат сто дена од моето преземање на функцијата Градоначалник на Oпштина Охрид. Во принцип, сто дена се доволен период да се направи една рамка на активностите на локалната самоуправа, која понатака треба да се надоградува и разработува.
Општина Охрид и јас како прв човек на локалната самоуправа, во овој период бевме исправени пред сериозен предизвик за отпочнување на еден нов начин на управување и функционирање на Охрид, со проекти, кои во Програмата им беа претставени на граѓаните, а тие во големо мнозинство ме легитимираа мене и мојот тим да го спроведеме ветеното.
Соочени со сериозни финансиски обврски на општината кои достигаат 32 милиони евра долгови кон голем број физички и правни лица, неорганизирана и неефикасна администрација, 428 судски спорови за неподмирени обврски и блокирана жиро сметка, состојба, која е  далеку понеповолна од нашите претпоставки.

Состојбата со општинските јавни претпријатија исто така е многу тешка. Преголеми долгови кои неможат да ги сервисираат, блокирани сметки и огромна превработеност во администрацијата, ги намалуваа перформансите на овие субјекти, загрозувајќи го нивното функционирање. Со спроведување на сосем нов концепт за управување, каде што Јавните претпријатија имаат зголемени обврски во својата работа, воведовме нов менаџмент во управувањето и прифаќање на нови форми на дејности кои може да ги извршуваат. Општинските Јавни претпријатија почнаа редовно да ги подмируваат обврските кон вработените за плати, да ги подмируваат обврските кон добавувачите и да ја вратат довербата кон граѓаните и кон економските партнери.
Општинските основни и средни училишта ги затекнавме со долгови за струја, нафта и превоз, а дел од нив со блокирани сметки со што им беше загрозена нивната функција. Заради тоа веднаш пристапивме кон санација на нивните обврски и одблокирање на сметките. Денес во општина Охрид нема училиште кое има блокирано сметка, а како дел од Програмата за развој на образованието, во текот на оваа лето ќе почнат да се санираат сите оние градежни и комунални проблеми кои беа евидентирани изминатиот период. 
Во една таква ситуација, неопходно беше изнајдување на нови решенија, односно мерки и активности кои ќе придонесат за санирање на состојбата, сервисирање на тековните обврски и отпочнување на нов инвестициски процес кој ќе донесе подобрување на перфомансите на општината и поквалитен живот за сите наши граѓани.

Во таа насока го воведовме потребниот и нужен ред во работењето и зајакнување на работната дисциплина, за сите вработени во  општинската администрација и јавните претпријатија, како прв услов за ефикасно работење и решавање на потребите на граѓаните во законски утврдениот  и разумен рок. Многу сериозно пријдовме кон решавање на проблемот со енормно големиот долг што го има општината, со активен однос со сите доверители, преку договарање на начините на сервисирање на  обврските, за што побрзо да биде одблокирана општинската сметка за непречено и ефикасно извршување на работите, а и доверителите да можат да ги наплатат своите побарувања.
Формиравме Локален Економски Совет или Совет на Градски Татковци во кој партиципираат докажани имиња во своите проефесии, по потекло од Охрид, кои се состануваа пленарно најмалку еднаш месечно и ги разгледуват конкретните предлози и проекти поврзани со еконономскиот развој на општина Охрид.
Заради динамизирање процесот на легализација на бесправно изградените објекти, формиравме 20 тимови од по двајца вработени во локалната администрација, кои од април до јуни посетија околу 5 000 домови, за на барателите да им ја објаснат постапката за легализација. Како резултат на таквиот пристап во периодот април-јули издадени се 221 Решение за легализација на бесправно изградени објекти, а од две формиравме четири комисии кои исклучиво ќе работат на процесот на легализација на објектите.
Во овој период вложивме многу напори да ги решиме, можеби најважните проблеми со кои се соочуват нашите граѓани, а тоа се инфраструктурните зафати. По претходно распишани јавни набавки, асфалтирани се повеќе од 25 илјади метри квадратни низ улиците во градот, а во тек е предмер и пресметка за повеќе селски населби. Поставени се нови водоводни инсталации во должина од преку 2000 метри и неколку стотици метри цевки за секундарна канализација.

Целосно се завршени реконструкциите и асфалтирањето на улиците:
- “Радојца Новичиќ“ во вкупна површина од 9873 метри квадратни;
- Улицата “АСНОМ“ во површина од 1609 метри квадратни;
- “Јане Сандански“  - 2050 метри квадратни; и
- “Сирма Војвода“ – 4517 метри квадратни,

а во тек е подготовката за целосно асфалтирање на улиците

 “Петрино“- 1.526 м2, каде што претходно е потребно тампонирање
“Богомилска“- 1.743 м2 и 
“Крум Точков“- 1.594 м2 каде е предвидено да се постави нова водоводна инсталација и атмосферска канализација.
Извршено е санирање на ударни дупки на следниве улици: Македонски Просветители, Даме Груев, Мите Богоески, Никола Карев, 7 ми Ноември, 15 Корпус, Ристо Чадо, населба Христо Узунов, Питу Гули, Кеј Маршал Тито, Гоце Делчев, Абас Емин, Кирил и Методиј, Егејска, Будва, Кленоец, Марко Цепенков, Пере Тошев, Стив Наумов, Пирин Планина во вкупна површина од 1654 м2.
Поставени се нови водоводни инсталации во должина од преку 2000 метри и неколку стотици метри цевки за секундарна канализација. Завршена е водоводната инсталација во населбата Рача во должина од 1300 м.

Во делот на уличното и јавното осветлување интервенирано е на улиците: “Крум Точко“, “Карпош Војвода“, “Момчило Јорданоски“, “Марко Цепенков“, “Ариф Мустафа“, “Даме Груев“, “Григор Прличев“, нас. “Свети Стефан“, при што се санирани поголеми или помали дефекти на електричната мрежа и се променети околу 400 неисправни сијалици.
Во тек се распишани јавни набавки за изведба и реконструкција на улици: Јане Сандански, Питу Гули, Ристо Чадо, 1- ва Македонска Ударна Бригада, Абас Емин, Васил Стефоски, краци на Ванчо Питошески, Охридати, Момчило Јорданоски, Крсте Мисирков, краци на улица Радојца Новичиќ, Ѓорѓи Сугаре и 28 Април, како и кружни раскрсници : помеѓу бул. Туристичка и ул. Бистрица и кружен тек кај населба Рача.
Сите рурални средини предвидено е веднаш после асфалтирањата во урбаниот дел, да добијат асфалтирани улици, за што е распишана јавна набавка која е во тек и тоа- с.Куратица, с.Ливоишта, с. Орман, с.Велгошти, с.Трпејца, с. Пештани, с. Коњско, с. Елшани и населбата Елешец, с. Подмоље и населбата Рача.
Распишан е Конкурс за идејно решение за изработка на пешачка патека од канал Студенчишта до Свети Стефан и конкурс за идејно решение за хортикултурно уредување на дел од бул. Св Наум Охридски до населба Св.Стефан.
Извршивме санација на електричната инсталација и го реконструиравме опожарениот влез во зграда на бул.Туристичка, кој неодамна настрада во пожар, а станарите со денови немаа струја и услови за користење на своите станови. 
Во холот на општинската зграда отворивме посебна инфо-точка која ќе можат да ја користат лицата со посебни потреби за задоволување на своите потреби од општинските служби.
Отворивме мобилна канцеларија за давање стручни совети на земјоделците, што ќе придонесе за подобра организираност на земјоделскиот сектор во општината.
За прв пат годинава ја воведовме манифестацијата БЕЛО ЛЕТО, со што симболично го најавуваме почетокот на летната сезона преку еден нов урбан имиџ, присутен во поголемите светски туристички центри.
Вчера официјално во Амбасадата на Германија со нивниот амбасадор, го потпишавме Договорот за допнација за целосна рехабилитација на каптажата на водоводниот систем во Куратица.

Сите овие активности и зафати се само мал дел од големата одговорност што ја имаме кон граѓаните на Општина Охрид и затоа Ве уверувам дека во наредниот период силно ќе бидеме сконцентрирани на реализација на проектите кои беа дел од понудената програма, а најголемите од нив се започнати или се во фаза на имплементација. Така во моментов активно сме насочени кон:
- Изработка на документација на изградба на првата технолошко- индустриска зона во Охрид, која треба да се изгради на локалитетот Мауцкер. Сознанијата се дека овој простор во моментов е најадекватен и на него најбрзо може да се реализира овој развоен проект, кој во иднина треба да се донесе инвестиции и изградба на фабрики во кои ќе се вработат наши граѓани;
- Во завршна фаза е ревизијата на Стратегијата за економски развој на општина Охрид, која предвидува нов период во економскиот развој на општина Охрид;
- Проектот за изградба на затворен пливачки базен на спортско-рекреативниот центар “Билјанини Извори“ е во фаза на изработка на архитектонско – урбанистичка документација, со која ќе се утврди точната локација на објектот. Затворениот базен ќе биде само еден дел од изградбата на современ спортско – рекреативен центар;
- Утврдена е локација за изградба на катна гаража во близина на Градскиот пазар, која е предвидена со Детален урбанистички план. Со тоа сметаме дека во многу ќе се подобри паркирањето на автомобили во централното градско подрачје и ќе се намали сообраќајниот метеж. Се работи на постапката за обезбедување документација за реализација на овој проект. Истовремено, се предвидува конечно изработка на Сообраќајна студија за Охрид, која долгорочно ќе го реши проблемот со сообраќајот во градот;

За поголем дел од нашите активности и планови, во изминатиов период, ги запознав и потенцијалните инвеститори со кои имав бројни средби, како и странските претставници и делегации кои беа во посета на Општина Охрид. Од преземањето на мандатот остварив средби со потенцијални инвеститори и дипломатски претставници од: Катар, Дубаи, САД, Украина, Унгарија, Чешка, Турција, Полска и Германија. Морам да истакнам дека наидов на  силна поддршка на нашите планови, Охрид да има силен економски развој и  да засјае во полна светлина, достојна на неговите историски, културни и природни вредности.

Почитувани сограѓани, Вие ќе ја имате можноста подетално да се запознаете со работењето на локалната самуправа за изминатие сто дена и преку брошура во печатена и електронска форма, која е отчет за сработеното. Дозволете ми на крајот од моето обраќање да Ве потсетам на мојата изјава при конституирањето на Советот на Општина Охрид дека Општината и градот Охрид повеќе не може да поднесе импровизации во својот развој. Поставувањето принципи на современо управување и донесување одлуки, мора да има една и единствена цел – да одговори на модерните форми на менаџирање со општината и да овозможи подигнување на квалитетот на живот на нашите граѓани. Во извршувањето на функцијата градоначалник и денес и во иднина цврсто ќе стојам на овој став. Ви благодарам на вниманието.

Извор: www.ohrid.gov.mk